కరోనా బారినపడి వేలాది మంది ప్రాణాలు కోల్పోతున్నారు. వైరస్ నుంచి కోలుకుంటున్న వారిలోనూ ఇతర సమస్యలు తలెత్తుతున్నట్లు పలు నివేదికలు చెబుతున్నాయి. ఈ మహమ్మారిని శ్వాసకోశ ప్రభావిత వైరస్గా చెప్పుకుంటున్నప్పటికీ.. నేరుగా గుండె కండరాలకు సోకుతుందని, గుండె దెబ్బతినడానికి దారితీసే ఇతర సమస్యలను కలిగిస్తుందని వైద్యులు చెబుతున్నారు.
ఊపిరితిత్తుల పనితీరుపై కొవిడ్-19 తీవ్ర ప్రభావం చూపుతోంది. దీని వల్ల గుండెకు సరిపడా ఆక్సిజన్ అందదు. అంతేకాదు గుండె లోపల కణాల్లో ప్రతి చర్యలు జరిగి మంటపుడుతుంది. తద్వారా గుండె జబ్బులు వచ్చే అవకాశముంటుంది. ఈ వైరస్ రక్త నాళాలపైనా దాడి చేస్తుంది. ఫలితంగా నాళాల్లో రక్తం గడ్డకట్టి గుండెనొప్పికి దారితీసే ప్రమాదం ఉంది. చాలా మంది కొవిడ్-19 రోగుల్లో శరీరం మొత్తం రక్తం గడ్డకట్టినట్లు గుర్తించారు వైద్యులు. అయితే.. దీనిపై వైద్యుల్లో ఏకాభిప్రాయం లేకపోయినప్పటికీ కొందరు వైద్యులు రక్తం గడ్డకట్టకుండా ఉంచే చికిత్సలు కూడా చేపట్టారు.
"గుండె సంబంధిత వ్యాధులతో బాధపడుతున్న వారికి కరోనా వైరస్తో ప్రమాదం అధికం. ఎలాంటి వ్యాధులు లేని కరోనా రోగుల్లోనూ గుండె సంబంధిత సమస్యలను గుర్తించాం."
- డాక్టర్ సీన్ పిన్నేయ్, చికాగో విశ్వవిద్యాలయం
అమెరికా కార్డియాలజీ కళాశాల జర్నల్లో ఇటీవల ప్రచురితమైన నివేదిక ప్రకారం.. ఆసుపత్రిలో చేరిన కరోనా రోగుల్లో 25 శాతం గుండె సంబంధిత సమస్యలు తెలెత్తినట్లు తేలింది. కొన్ని కేంద్రాల్లో అది 30 శాతం నుంచి ఆపైన నమోదైనట్లు తెలిసింది. కరోనా లక్షణాలు తక్కువగా ఉన్న రోగుల్లోనూ.. ఎంజైమ్ స్థాయిలు తగ్గటం సహా ఇతర సమస్యలతో గుండె దెబ్బతినే సంకేతాలను కొన్ని అధ్యయనాలు కనుగొన్నాయి. అయితే.. ఈ సమస్య తాత్కాలికమా, శాశ్వతమా అనేది తేల్చలేదు.
కొంత మంది న్యుమోనియాతో మరణించిన కొవిడ్-19 రోగుల్లోని గుండెలో.. కరోనా వైరస్ను గుర్తించినట్లు ఓ పరిశోధనలో బహిర్గతమైంది. మరో అధ్యయనంలో.. కరోనా నుంచి కోలుకున్న నలుగురు అథ్లెట్లలో గుండె కండరాల సమస్య తలెత్తినట్లు తేలింది. అయితే పూర్తి స్పష్టత కోసం ఇంకా పరిశోధన అవసరమని అమెరికా కార్డియాలజీ కళాశాల బోర్డు సభ్యుడు డాక్టర్ టామ్ మాడాక్స్ అభిప్రాయపడ్డారు.
ఇదీ చూడండి: దీర్ఘకాలంలోనూ కరోనా వైరస్ ప్రభావం?
